پروشنه
محمد علي عسگري
مايوش به زبيدي و عصمتيش وات : وروسيد ايشيد يخورده صيغته بورا گوسفندا ياريد . از او گاله اي که پشتي ملکا وهو . دوتايي ايشيد و زو په ييد. فقط واخب بيد وقتي شيشوريد خوب شيشوريد . صيغته ها خورد ايکيريد تا اوخورن . مالي وقتو وشه هن .
زبيدي و عصمتي ديه ايشي و هم که . دوتايي وروساين و اوشوين طويله . گوسفندا راسي راسي وششي بوي . بوزغاله چوه شوات : مععععععع . ويره چوه شوات : بعععععع . مشي پيره شوات مقققققق . بزه جي شوات : بغغغغغغغغ . عصمتي شوات : خوبو خوبو اوسمي جيغو داد نکيريد . . زبيدي جي شوات : کوفت اوخوريد . چقد شما تل مسه هيد . خسته گرتايم وسکي بورا شوما صيغه تمي يارت
بي معطلي ايکي از سوده هاشي ورگيرفت و بر وسّن . تگي ملکا يه گاله شي دارت گو بورا زيمستون صيغته شي خاک کرته بوي . خوي کفتون و پنجولا خاکوشي ار زي و چندتا گيزر و شلم و چوغندروشي برکه . دياشي و تو سوده ريت و دوباره گالشي قايم که و ره کفتن . دوتايي خوي هم تعريفوشي که ، خنداين و آوازوشي وروخونت و شوين . دمي مچّي گو ايرساين صيغته هاشي و تويي حوضي دمي مچي ريت و خوي کلوکوچويي گو هيميشه اويي وبوي اياشي شيشوت . هووا سرد بوي آما وچه ها انگاري حاليشي نبوي . هيمي دوجور خنداين و کاروشي که . وقتي جي دستاشي يخوشي که جلوي ديموشي گيرفت و هاشي که . زبيدي دستوشوش تويي چارقدش که تا گرمه بو . صيغته هاشي اوشوشت و شيبه تا خورد ايکيرن . بعد ايبرين و گوسفندا تن . وقتي کاروشي توموم گرتا په يوميين کيه و اشوين يورتي مهموني . مثلي دو گو مهمونوشي دارت .
تويي يورت ، حاج عباس يوميه بوي و دارتو بورايي جنا روضه يي دو طفلان مسلموش وروخونت . به غير از مايوش، چن تا جن بي جي بوين و دارتن گوششي ودا . بعضي وقتا جي ناخيالکي يهو شيبرمبا . يه دفه وسط دو مجلس بوي گو عصمتي يه پروشنش که. زبيدي شيوي لوي ايخندا . چن دقه بعد دوباره عصمتي يک پروشنه يي بيش که . باز زبيدي تير و تير ايخندا . چن تا دوته چويي بي جي گو بوين ايخنداين . مايوش يه ويشگونوش و زبيدي گيرفت . هيمي دو باعث گرتا گو وچا وشتر ايخندن . عصمتي يه پروشنه يي بيش که .
حاج عباس از کوره بر وسّا و وطيرفش شوي . سيگه گو ايرسا يه مشتش حواله يي عصمتي که . مشت سنگين حاج عباس و تو صورتي عصمتي خارت و گارامبي صوداش که . حاج عباس په وگرتا و سري ياش و هنيگشت . شيوي لوي يه چي ياييش جي وات : دوتيي خيره سر . وس ناکيره . انجوا غرغروشيکه و شيوات : حاجي ولش وکر . وچه گو دي چيا نافهمن . شوما مري عاقليد ماشاء الله
عصمتي يه جيغي خفش ورکيشا و ابي هيچيش نوات . وچ دوتوها ساکت و غمگين دارتن سيلوشيکه . عصمتي سيگه گو هنيگشته بوي شيدي يه چيي وتو کشوش کفت. ايکي بي . ايکي بي . کشوش دارتو رنگي سرخي گرتا.
عصمتي بارها خون دوماغ گرتايه بوي . آما مثلي دو گو دو دفه با او دفه ها فرقوش دارت . مايوش گو شيفهما فوري دوته چوش ورگيرفت و بر وس . زبيدي خوي چندتا دوته چوهايي بي جي ردشي اوشوين تا و سري جو رساين . مايوش چش و ديمي عصمتيش اوشوشت . نه يه بار گو چن بار . فايده ايش ندارت . خون بند ناتومه . خوي چندتا جل کهنه بري دوماغ و دهن عصمتيش هبست . باز جي فايده ايش ندارد . کم کم حاج عباس خوي انجوها از کيه بر يوميين . هرکي يه چييش وات . ايکي شوات دوماغوش داغي ايکيريد . دوماغوش موحکم ايبنديد . ايکي بي شوات دوراز به دوراز هش ووسنيد .
حاج عباس دارتو خيره سيلوشيکه . يهو تند اوشوي و يه کفتونش يارت . اشوي تگي سيدر و يه کفتون ليجينوش برارت . صاف شويارتو و روسري عصمتيش نا . سروش خونيک گرتا . سروش سنگين گرتا . انگاري خووش تومه . مولوش دارتو دريکفت . طاقتي سنگيني ليجيناش ندارت . چشاشش و روهم يومه و دوراز و دوراز هووفت . مايوش هونم دارتو دوماغي خونيي دوته چوش پاک ايکه . عصمتي هووفت و ابي نش فهما کيگه خوني دوماغش بند يومييه .
حاج عباس خوي ترس و شک دارتو دوته چوش سيلي ايکه . ايکي از انجوها وشش وات : ميگه دوته چووه چوکاروش کرته بوي ؟ ايکي بي شوات : مري قل چوماق زورش و يه وچه رسايه . ايکي بي از حاجي وش رسا بورا چي سيگه مشتت و تو صورتي دوته چوه بست ؟ حاج عباس هيمي دو جور گو ساکت بوي و فکروشيکه شوات : خويوم جي نازوني !
ترجمه داستان را در ادامه مطلب بخوانيد .
يه ,گو ,شوات ,عصمتي ,جي ,بي ,حاج عباس ,ايکي بي ,بي جي ,و يه ,دوته چوش
درباره این سایت